Gengið hefur verið frá ráðningu mótastjóra hjá BLÍ og er það Rósborg Halldórsdóttir sem tekur við starfinu af Óla Þór Júlíussyni sem sinnt hefur starfi mótastjóra sl. 4 ár. Rósborg er alls ekki ókunnug blaki, en hún er uppalin í Mosfellsbæ og spilaði með Aftureldingu allt til ársins 2016 þegar hún flutti til Bandaríkjanna að spila háskólablak. Síðustu ár hefur hún búið í Georgíu fylki og starfað sem blak þjálfari og dómari samhliða tónlistarnámi. Rósborg hefur unnið að uppbyggingu á barnastarfi hjá blakklúbbnum Colavol í Georgíu undanfarin ár og hlakkar til að taka þátt í starfi blaksambandsins sem mótastjóri. Rósborg mun sinna starfinu bæði á skrifstofu BLÍ og í fjarvinnu frá Ameríku. Þess má geta að Rósborg verður á landinu í sumar og hefur hún undanfarið unnið að skipulagningu skólablakverkefnis BLÍ ásamt því að stýra fræðslu og útbreiðslunefnd BLÍ. Við bjóðum Rósborgu velkomna í teymið og erum mjög spennt fyrir samstarfinu og komandi tímum.
